நடிகர் சோனு சூட்…
கொரோனா ஊரடங்கு காலத்திலும் அதற்குப் பின்னரும் சிக்கித் தவிக்கும் ஆயிரக்கணக்கான புலம்பெயர்ந்தோரை தங்கள் சொந்த கிராமங்களுக்கு அனுப்ப முயற்சித்ததற்காக சமூக ஊடகங்களில் ஹீரோவாகப் போற்றப்பட்ட நடிகர் சோனு சூட், ஐக்கிய நாடுகளின் மேம்பாட்டுத் திட்டத்தின் (யுஎன்டிபி) மதிப்புமிக்க எஸ்.டி.ஜி சிறப்பு மனிதாபிமான செயல் விருதுடன் கௌரவிக்கப்பட்டுள்ளார்.
கொரோனா வைரஸ் நெருக்கடியின் போது சிக்கித் தவிக்கும் புலம்பெயர்ந்தோருக்கு உணவு, பேருந்துகள், ரயில்கள் மற்றும் சிறப்பு விமானங்களை ஏற்பாடு செய்து, சிறந்த வாழ்வாதாரத்திற்கான வேலை வாய்ப்புகளை வழங்கியதற்காக கடந்த திங்களன்று நடந்த மெய்நிகர் விழாவில் நடிகர் சோனு சூட் இந்த விருதைப் பெற்றுள்ளார்.
ஜூலை மாதம் நிசர்கா சூறாவளி மகாராஷ்டிரா கடற்கரையைத் தாக்கும் முன்பு 47 வயதான நடிகர் சோனு சூட் மும்பையில் உள்ள தனது ஹோட்டலை மருத்துவ வல்லுநர்களுக்காக தங்குவதற்கும் மும்பையில் பலருக்கு பாதுகாப்பான தங்குமிடங்களை ஏற்பாடு செய்வதற்கும் முன்வந்தார்.
பிரியங்கா சோப்ரா, லியோனார்டோ டிகாப்ரியோ, ஏஞ்சலினா ஜோலி, டேவிட் பெக்காம், எம்மா வாட்சன், லியாம் நீசன், கேட் பிளான்செட், அன்டோனியோ பண்டேராஸ் மற்றும் நிக்கோல் கிட்மேன் ஆகியோர் ஐ.நா.வின் பல்வேறு அமைப்புகளால் மனிதாபிமான விருது பெற்ற பிற பிரபலங்கள் ஆவர்.
சோனு சூத்துக்கு வழங்கப்பட்ட விருது குறித்து யு.என்.டி.பி அளித்த அறிக்கையில், “திரு சோனு சூட்டுக்கு வழங்கப்பட்ட சிறப்பு மனிதாபிமான செயல் விருது அவருக்கு நிலையான அபிவிருத்தி இலக்குகள் ஒருங்கிணைப்பின் ஆதரவு மையமாக விளங்கும் பஞ்சாப் அரசின் திட்டமிடல் துறையால் வழங்கப்பட்டது.
ஒரு சுயாதீன நடுவர் மன்றத்தின் பரிந்துரையின் அடிப்படையில் விருது பெற்றவர்கள் தேர்வு செய்யப்பட்டனர். யு.என்.டி.பி நேரடியாக இந்த தேர்வில் ஈடுபடவில்லை. இந்த விருதை பெற்ற திரு சூட்டை நாங்கள் வாழ்த்துகிறோம். இந்த சவாலான காலங்களில் மக்களுக்கு உதவும் அவரது மனிதாபிமான முயற்சிகளை பாராட்டுகிறோம்.” எனத் தெரிவித்துள்ளது.
ஊரடங்கின் போது, சோனு சூட் ஒரு கட்டணமில்லா ஹெல்ப்லைன் எண்ணைக் கூட அறிமுகப்படுத்தினார்.
இதனால் கொரோனா வைரஸ் நெருக்கடியின் போது உதவி தேவைப்படுபவர்களுக்கு அவர் உதவ முடியும். சமூக ஊடகங்களில் நிதி உதவி கேட்ட திரைப்பட சகோதரத்துவத்தின் இரண்டு உறுப்பினர்களையும் அவர் அணுகினார்.
தமிழ் உள்ளிட்ட பலமொழித் திரைப்படங்களில் வில்லனாக நடித்து மக்களிடையே பிரபலமான சோனு சூட், நிஜ வாழ்க்கையில் தனது உதவிகள் மூலம் மக்களிடையே ஹீரோவாக வலம் வருகிறார்.
ஐநாவின் இந்த விருதுக்கு அவர் பொருத்தமானவர் தான் என அனைத்துத் தரப்பிலிருந்தும் பாராட்டுக்கள் குவிந்து வருகின்றன.
